AL SCIOR AVVOCATT MARTINELLI
Al scior avvocatt Martinelli a Abano
Tra i tanc amis de casa Martinella,
che s'hin vodaa al gran Sant di Padovan*
per fà ch'el torna a cà viscor e san,
ghe sont anch mì sò servitor brighella.
E adess che grazia al Sant semm squasi a quella
d'avell, come el vorevem, in Milan,
troeuvem giust ognidun de tirà a man
quaj regall* de mandagh alla cappella.
Intant però che i sozzi hin in desputta
per inventà on regall che rappresenta
la spezia della grazia rezeputta,
mì in qualità de cavalier del dent*
ghe mandi per cunt mè a posta correnta
dò sguansc de azzal ch'hin mej che né d'argent.*
